គ្រាប់បាល់ដែលកើតឡើងដោយការវិការទាត់បកក្រោយដ៏អស្ចារ្យរបស់ខ្សែប្រយុទ្ធ Erling Haaland បានជួយក្រុមថ្មី Manchester City យកជ័យជម្នះទាំងប្រផុតប្រផើយលើក្រុមចាស់របស់ខ្លួន Borussia Dortmund ក្នុងលទ្ធផល ២-១ ខណៈគ្រាប់បាល់នេះ ធ្វើឱ្យលោក Pep Guardiola រឭកដល់អ្នកណែនាំគាត់ លោក Johan Cruyff។
កីឡាករសញ្ជាតិន័រវេសរូបនេះ បានរក្សាភាពស្ងៀមស្ងាត់គួរឱ្យកត់សម្គាល់ តែគ្រាន់តែត្រូវការការបង្ហាញសញ្ញាត្រេកអរតិចតួចបំផុត ដែលបានស៊ុតបញ្ចូលទីដល់ទៅ ៦ហ្គេមជាប់គ្នា ខណៈដែលជើងឆ្វេងដ៏រហ័សរហួនរបស់គេ បានជួយឱ្យក្រុមម្ចាស់ផ្ទះ Man City រកឃើញនូវជ័យជម្នះ នៅប្រមាណជា ៦នាទី ពីម៉ោងធម្មតា។
ឥឡូវនេះ កីឡាករ Haaland ទម្លុះសំណាញ់ទីបាន ១៣គ្រាប់ហើយ ក្នុងចំណោមការចូលលេង ៩ដងឱ្យក្រុមមេឃខៀវ Man City គិតចាប់តាំងពីពួកគេបានបំពេញលក្ខខណ្ឌ ៦០លានអឺរ៉ូ (៦០លានដុល្លារ) ជាមួយក្លិបយក្សអាល្លឺម៉ង់ Dortmund។
ក្រោយឃើញគ្រាប់បាល់របស់កីឡាករ Haaland លោក Guardiola បាននិយាយថា៖ «មនុស្សគ្រប់គ្នាដឹងច្បាស់ថា តើមនុស្សម្នាក់ លោក Johan Cruyff មានសារសំខាន់ក្នុងជីវិតរបស់ខ្ញុំយ៉ាងដូចម្ដេច។ ក្នុងនាមជាមនុស្សម្នាក់ អ្នកអប់រំ អ្នកណែនាំ ពោលគឺអ្វីគ្រប់យ៉ាង គាត់បានស៊ុតបញ្ចូលទីនៅទឹកដី Camp Nou ជាគ្រាប់ដ៏អស្ចារ្យ ទល់នឹងក្រុម Atletico Madrid (ក្នុងឆ្នាំ១៩៧៣) ដែលមានលក្ខណៈស្រដៀងគ្នានេះ។ ពេលដែលគេ (Haaland) ស៊ុតបញ្ចូលទី ខ្ញុំបាននឹកដល់លោក Cruyff»។
យ៉ាងណាការប្រកួតនេះ ក្រុមម្ចាស់ផ្ទះក៏រាងលំបាកគួរសមដែរ ទម្រាំដណ្ដើមបានជ័យជម្នះ ជាពិសេសពេលត្រូវក្រុមភ្ញៀវនាំមុខមុន ដែលស៊ុតបញ្ចូលទីដោយ Jude Bellingham នៅនាទីទី១១ នៃវគ្គទី២ តែកីឡាករបម្រុង ៣រូប បានជួយដាស់ក្រុម Man City ឱ្យភា្ញក់ឡើងវិញ ហើយចុងក្រោយ ក៏រកបាន ២គ្រាប់ផ្ទួនៗ ក្នុងរយៈពេលតែ ៤នាទី។
ខ្សែការពារ John Stones បានបាញ់ ១ជើងពេញពីក្រៅប្រអប់គ្រោះថ្នាក់ ហើយបាល់ចូលទីយ៉ាងស្អាត ដែលជួយឱ្យក្រុម Man City តាមស្មើវិញនៅនាទីទី៨០ មុននឹងមានគ្រាប់បាល់ដ៏អស្ចារ្យពីកីឡាករ Haaland នៅនាទីទី៨៤ ដែលផ្ដល់ភាពជោគជ័យឱ្យក្រុមថ្មីរបស់ខ្លួន៕
